*बाप बाहेर आलाय..म्हणत येरवडातून सुटल्यावर भाईची रॅली, पोलिसांनी तिथूनच काढली धिंड*

पुणे प्रतिनिधी (नारायण अलदार):- पुण्यातील एका भाईला जेलमधून सुटल्यावर रॅली काढणे महागात पडलं आहे. आता जेलमधून बाहेर आल्यावर रॅली काढून दहशत पसरवायची एक नवीन स्टाईलच झाली आहे. गुन्ह्यांची शिक्षा भोगल्यावर बाहेर आल्यावर गन्हेगार आणखी दहशत पसरवण्याचा प्रयत्न करत आहेत. पुण्यातील एका भाईला अशी जंगी मिरवणुक काढणे चांगलंच महागात पडलं आहे. मोक्कामध्ये येरवडा जेलमध्ये असलेला प्रफुल उर्फ गुड्या गणेश कसबे हा जेलमधून बाहेर आला. त्यानंतर त्याने आणि त्याच्या सुमारे ५०-६० समर्थकांनी येरवडा बाजार परिसरात आलिशान कारमधून रॅली काढली. रॅलीचा व्हिडिओ आता समाज माध्यमांवर व्हायरल होत आहे. परिसरातील नागरिकांना रॅलीमधील युवकांनी धमकावले होते असे देखील नागरिकांचे म्हणणे आहे.

आता बाप बाहेर आलाय, बॉस बाहेर आलाय म्हणून रॅलीमधील युवकांनी नागरिकांना शिवीगाळ केली. याप्रकरणी येरवडा पोलिसांनी प्रफुल्ल उर्फ गुड्या कसबे टोळीविरुद्ध वाहनांची तोडफोड आणि दहशत निर्माण केल्याप्रकरणी गुन्हा दाखल केला आहे. बुधवारी संध्याकाळी ते तुरुंगातून बाहेर आले, तेव्हा त्यांच्या सुमारे ५० समर्थकांनी त्यांचे स्वागत करण्यासाठी मिरवणूक काढली. त्यासंदर्भात  कॉन्स्टेबल लहू गडमवाड यांच्या तक्रारीवरून येरवडा पोलीस ठाण्यात हा गुन्हा दाखल करण्यात आला आहे.

प्रफुल्ल उर्फ गुड्या कसबे (रा. भीम ज्योत सर्वे नंबर 12 लक्ष्मी नगर, येरवडा पुणे), दीपक मदने, करण सोनवणे, अनिकेत कसबे, अंश पुंडे, अजय कसबे, सागर कसबे, अभिजीत ढवळे, राहुल रसाळ, नन्या कांबळे, रोशन पाटील, तुषार पेठे, व इतर 35 ते 40 इसम यांच्यावर Cr No-19/25 कलम भारतीय न्याय संहिता 2023 चे कलम 189 (2), 190, 223, 281, क्रिमिनल लॉ अमेंडमेंट कायदा कलम 7 सह महाराष्ट्र पोलीस कायदा कलम 1951 चे कलम 37 (1) (3) सह 135 प्रमाणे गुन्हा दाखल करण्यात आला आहे. या गुन्ह्यातील नऊ आरोपींना येरवडा पोलिसांनी अटक करत त्यांची शहरात धिंड काढली. येरवडा पोलिसांनी रॅली काढणाऱ्या आरोपींना चांगलाच दणका दिला आहे. गुन्हेगारी प्रवृत्तीला आळा घालण्यासाठी येरवडा पोलीसांनी उचलेले पाऊल कौतुकास्पद  असल्याची चर्चा नागरीकांमध्ये होत आहे.