आमदाराच्या मामाचा झाला खून

पुणे प्रतिनिधी (नारायण अलदार):-

विधान परिषदेचे भारतीय जनता पार्टीचे आमदार योगेश टिळेकर यांचे मामा सतीश वाघ यांची हत्या का करण्यात आली याबद्दलची माहिती पुणे पोलीस आयुक्त अमितेश कुमार यांनी दिली आहे. पुण्यामध्ये पत्रकारांशी संवाद साधताना अमितेश कुमार यांनी या हत्येसंदर्भातील तपशील दिला आहे. सतीश वाघ यांची हत्या वैयक्तिक कारणातून झाली असल्याचे अमितेश कुमार यांनी स्पष्ट केले आहे. सतीश वाघ त्यांना ठार मारण्यासाठी 5 लाख रुपयांची सुपारी देण्यात आली असल्याची माहिती पुणे पोलिसांनी मिळाली. वाघ यांच्या शेजारी राहत असलेल्या व्यक्तीनेच हे सगळे कृत्य केल्याचे तपासातून समोर आले असून खून हा खाजगी आणि वैयक्तिक कारणातूनच केल्याची कबुली आरोपींनी पोलिसांना दिली आहे.

पुणे पोलिसांनी दिलेल्या माहितीनुसार याप्रकरणी 5 आरोपींपैकी तिघांना पोलिसांनी अटक केली आहे. ज्या व्यक्तीने सतीश वाघ यांच्या हत्येची सुपारी दिली त्याला देखील पुणे पोलिसांनी अटक केली आहे. या संपूर्ण घटनेचा सखोल तपास सुरू असून दोषींवर कठोर कारवाई केली जाईल असे आश्वासन पोलीस आयुक्तांनी दिले आहे. 

पुणे क्राईम ब्रँच पथकाने 10 ते 15 जणांच्या चौकशीनंतर पवन शर्मा आणि नवनाथ गुळसाळे या दोन आरोपींना ताब्यात घेतले आहे. यानंतर अन्य एकालाही अटक करण्यात आली आहे. याबाबतचा घटनाक्रम समोर आला असून अपहरण व खून या दोन्ही घटना अवघ्या काही तासांच्या आत घडल्याचे पोलिस तपासातून समोर आले आहे. वाघ यांचे सकाळी साडेसहा वाजता अपहरण झाले आणि त्यांचा खून करून आरोपींनी त्या गाडीत त्यांचा मृतदेह टाकून ती गाडी सातेसात वाजता परत आली असल्याचे सीसीटीव्ही फुटेजमधून दिसून आले आहे. 

500 ते 800 सीसीटीव्ही, तांत्रिक विश्लेषणनंतर पुणे पोलिसांना सतीश वाघ यांचा मृतदेह शोधून काढला. सतीश वाघ हे पहाटे साडेसहाच्या सुमारास मॉर्निंग वॉकला गेल्यानंतर शेवरलेट एन्जॉय या कारमधून त्यांचे अपहरण झाले असल्याचे पोलीस तपासात समोर आले आहे. सतीश वाघ यांचे अपहरण केल्यानंतर आरोपींनी ती गाडी शिंदवणे घाटाच्या दिशेने नेली. आरोपींनी गुन्ह्यात वापरलेली कार सीसीटीव्ही फुटेजमध्ये कैद झाल्यानंतर पोलिसांनी अनेक भागातील जवळपास 500 ते 800 सीसीटीव्ही तपासले. त्यात एक गाडी शिंदवणे घाटाकडे जाताना उरूळी कांचन भागात 7 वाजून 5 मिनिटांनी पोलिसांना दिसून आली. तीच गाडी पुन्हा सात वाजून 20 मिनिटांनी परत आल्याचे दिसून आल्यानंतर पोलिसांचा संशय बळावला. 

अपहरण केल्यानंतर चालत्या गाडीतच सतीश वाघ यांचा तीक्ष्ण शस्त्राने व लाकडी दांडक्याने मारहाण करून व गळा दाबून खून करण्यात आला. या गुन्ह्याचा पुढिल अधिक तपास पुणे पोलीस करीत आहेत.