सोलापूर महापालिकेत लोकशाहीचा 'गळा आवळला'! भाजपा शहराध्यक्षांची 'हुकूमशाही', नगरसेवकांचे माईक बंद करणे सभागृहात प्रश्न मांडू न देणे आणि बजेटमध्ये ५०% कपात: सोलापूरच्या विकासाचा 'बळी'?

जगदीश कोरे (प्रतिनिधी)सोलापूर: सोलापूर महानगरपालिकेच्या सभागृहात सध्या जे काही चालले आहे, ते पाहता लोकशाहीची सर्व तत्वे धाब्यावर बसवली जात आहेत की काय, असा गंभीर प्रश्न निर्माण झाला आहे. 'नगरसेवक' हा केवळ नावापुरता 'सेवेकरी' राहिला असून, प्रत्यक्षात सत्ताधारी नेत्यांच्या 'दंडेलशाही' आणि 'हुकूमशाही' कार्यपद्धतीमुळे नगरसेवकांचा आवाज दाबण्याचे काम सुरू असल्याचा खळबळजनक आरोप आता खुद्द सत्ताधारी भाजपच्याच नगरसेवकांकडून केला जात आहे.

भाजप शहराध्यक्षांची 'दंडेलशाही': नगरसेविकेचा माईक बंद? सभागृहात प्रश्न मांडू न देणे?

सोलापूरच्या इतिहासात कधीही न घडलेला प्रकार नुकत्याच झालेल्या महासभेत घडला. भाजपच्या शहराध्यक्षा तथा स्वीकृत नगरसेविका रोहिणी तडवळकर यांनी सभागृहात आपली सत्ता आणि पदाचा वापर करून विरोधी आणि अगदी स्वपक्षीय नगरसेवकांनाही बोलण्यापासून रोखल्याचा आरोप आहे.

या संतापजनक घटनेचे सर्वात मोठे उदाहरण म्हणजे, एका महिला नगरसेविकेने जेव्हा आपल्या प्रभागाचा प्रश्न मांडण्याचा प्रयत्न केला, तेव्हा रोहिणी तडवळकर यांनी थेट त्यांच्या जागेवर जाऊन त्यांचा माईक बंद केला. ही केवळ अभिव्यक्ती स्वातंत्र्याची गळचेपी नसून, त्या प्रभागातील हजारो नागरिकांचा अपमान आहे. आपल्या प्रभागाच्या समस्या घेऊन सभागृहात मांडणारा नगरसेवक जेव्हा बोलूच शकत नाही, तेव्हा शहराचा विकास कसा होणार? पहिल्याच बोर्डात दिसलेली ही 'हुकूमशाही' आगामी काळात महापालिकेचे कामकाज कोणत्या दिशेने नेणार, याची भीती आता सर्वांना वाटू लागली आहे.

विकासकामांना मोठा 'ब्रेक': २०२६ च्या बजेटमध्ये ५०% पेक्षा जास्त कपात!

एकीकडे सभागृहात बोलण्याचा अधिकार नाकारला जात असतानाच, दुसरीकडे स्थायी समिती सभापतींनी सोलापूरकरांच्या जखमेवर मीठ चोळले आहे. २०२६ च्या प्रस्तावित बजेटमध्ये विकासकामांच्या निधीत ५०% पेक्षा जास्त कपात करण्यात आली आहे. या धक्कादायक निर्णयामुळे:

 * रखडलेली कामे: रस्ते, पाणी, स्वच्छतेचे प्रश्न आणि नवीन प्रकल्प पूर्णपणे ठप्प होण्याची शक्यता आहे.

 * नगरसेवकांची ओरड: प्रभागातील कामे होणार कशी? या विचाराने सत्ताधारी आणि विरोधी अशा दोन्ही बाजूंच्या नगरसेवकांमध्ये तीव्र असंतोष निर्माण झाला आहे. कपात केलेला निधी नक्की कुठे जाणार आणि यामुळे कोणाचा फायदा होणार, हा प्रश्न आता विचारला जात आहे.

सत्ताधारी भाजपमध्येच 'गृहयुद्ध': सोलापूरकरांचे नुकसान?

विशेष म्हणजे, ही ओरड आणि हे आरोप केवळ विरोधकांचे नसून, खुद्द भाजपच्याच अनेक नाराज नगरसेवकांचे आहेत. "रोहिणी तडवळकर यांची हुकूमशाही पक्ष संघटना आणि महापालिका या दोन्ही ठिकाणी सुरू आहे," अशी खदखद नगरसेवकांमध्ये आहे. जर सत्ताधारी पक्षातच असा अंतर्गत कलह आणि ताळमेळ नसेल, तर शहराचा विकास कोण करणार?

भौतेक भाजपाला सोलापूर शहराचा विकास करायचाच नाही, अशा प्रतिक्रिया आता सामान्य नागरिकांकडून येऊ लागल्या आहेत. केवळ सत्तेच्या राजकारणात सोलापूरकरांच्या हक्काचा विकासबळी दिला जात असल्याची भावना निर्माण झाली आहे.

आमचा सवाल:

लोकशाहीत सत्तेचा वापर लोकहितासाठी व्हायला हवा, न की स्वतःची हुकूमशाही गाजवण्यासाठी. सोलापूर महापालिकेत सुरू असलेला हा 'लोकशाहीचा गळा आवळणारा' प्रकार त्वरित थांबावा आणि नगरसेवकांना त्यांचे प्रश्न मांडण्याचा अधिकार पुन्हा मिळावा, अशी मागणी आता जोर धरू लागली आहे.